Fruts e sarvisjis

Eisal just coinvolzi i fîs tai lavôrs di cjasa? In passât a era la normalitât, ma in dì di vuei, cence stalas e cence nemai, a è lada ju pa ruvisj encja chesta usança. 

Jodiju pas monts al è in pratica impussibil, cjatâju a darpâ par prâts e cjamps al è cuasi un miragjo. I fruts di vuei a no son come che di una volta, cuant che al era normâl che encje lôr a contribuissin ai lavôrs in cjasa e al funzionament da famea. Sji capisj: atas gjenerazions, un ati mût di jodi la vita. Sarvisjis in cjasa, la normalitât par cui che vuei al à passât i cincuanta. Una rouba di strani par i fruts di vuei, un grum cjapâts dai tablet e dai balons. E si capisj che i balons, il sport, il cori pas places a son simpri mior dai tablet. Podopo a subentra encja una ata condizion: chê che magari al seti domandâ massa al frut. O che il frut, za strac da scuela e di atas ativitâts, si strachi incjemò di plui. Vuei i ritmos a son cambiâts, no sji tegnin plui vacjas, prâts e fens. Il “fâ lavorâ un frut” al è jodût come alc di contrari ai dirits dal frut, encje se magari cualchi sarvisji al fâs sipri ben, se no ati parcè che cussì sji ur insegna il sens dal dovei e da responsabilitât.

«Nou ju vin simpri fat, come se al fos alc di normâl» a nus conta la Ines di Aip. «No sai se come fruts davin plui una man o se erin di impaç, ma in famea sji era in tancj e se no sji stava pas corts, erin simpri fra stalas e prâts. E nus domandavin ben cualchi sarvisji. Fasjin il cont da canaia che a zirava doma par Aip: Aì di Tita a ‘nd era 10, la Cilda a ‘nd veva 7, la Clelia 5, la Marga 3, Teresin 3 e mê mari 6». Una volta i fruts sji ju jodeva encja in mont. «D’estat Siro al cjamava il Lavareit. Il Celso e il Maurizio ai erin ben fruts, ve, che a lavin in mont a lassù. A un ciert moment al à tolet un mùs par partâ su e jù la spesa e il formadi. Mi impensi che il Maurizio al veva 9 agns, cuant che, una dì, a lu à mandât ju cul mùs, cjamât di formadis. Insoma chest mùs che al era vecjo al doveva passâ l’aga di un riu, ma al è colât ta l’aga cun duta la cjama dal formadi, finît tal aga denti encja chel» a conta la Ines. Par i fruts di chê volta, e considerant che al era un periodo di miseria, lâ in mont a era cuasi una strada obligada: un mût par puartâ a cjasa cualchi franc cença lontanâsi massa dal paîs. «Soredut in tas fameas cun tancj fîs come la mê – a zonta Margherita Fumi – a sucedeva che las sûrs plui grandas a jodevin dai plui piçui, parcè che la mari a no veva massa timp par jodi di lôr, intivada tas facendas di cjasa o ta campagna».

«Ramondâ, lâ a puartâ ledan, lâ a fâ una legna… fasevin di dut. E sji començava subit, apena fûr dal patusj» a sji impensa la Bice di Valerio. «Cuant che lavin a scuela, vevin la pausa fra miesdì e las dôs. In chês dôs oras a ‘nd era simpri alc da fâ: o un zîr di ledan ta Gleria o la a butâ cartufulas. No tu stavas mai cu las mans in man. D’atom a sji sforcjava, plui viers otobar. Un grum plui tart di cumò. E dopo, immancabile, guai mancjâ al Rosari, la sera». Sui prâts d’estât al era dut un taiâ, spandi las solts, zirâ il fen, fâ cavoi. «A sji judava cemût che si podeva, cualchidun al lava encje in mont. Clâr che cumò no sji usa plui… a no ‘nd è nencja plui nè vacjas, nè stalas!».

In veretât a ‘nd è una persona a Cleulas che a puarta incjemò indevant chest discors di clamâ i siei fruts a colaborâ tai sarvisjis di fâ in cjasa e in campagna. La Ursula di Paulino a à una so particolâr filosofia: e jei a pos encje metila in pratica facilmenti jodût che a à encje una sô ativitât agricola. «Jo ai miei fîs ur spieghi che intuna famea ducj a àn di vei un lôr compit. I gjenitôrs a àn il lôr, che al è chel di lavorâ, ma par mandâ indevant la famea bisugna che ducj i elements a colaborin. Ducj a podin fâ alc, in base a l’etât». I sarvisjis che la Ursula a domanda ai siei 3 fruts (la cuarta a è incjemò massa piçula) a van dal lâ a vierzi o sierâ las gjalinas, a netâ o ordenâ una stanza, scovâ las scjalas, passâ l’aspirapolvere, puartâ cualche legna dal bosc, tant par fâ cualchi esempli. Il plui grant, che al va a scuela a Tumieç, al comença za a lâ cu la falciatrice. «Par me al vûl dî, parcè che cun 4 fruts, la cjasa e l’ativitât, vêi una man a cji lezerisj il lavôr. E la gjestion da famea a sbrissja via plui facilementri. Se no lu fassaressin lôr, al tocjarès a mi o al gno om». Secont la Ursula, chest gjenar di sarvisjis al coventa encja par preparajual avignî e par fâju diventâ autonomos. «A ur coventarà par il doman – a zonta la Ursula -. No sta crodi che i fruts a no sji lamentin. Cuant che a mi disjin che la mari di un lôr amî siguramenti no fâs fâ sarvisjis al propri fî, jo rispuint al gno frut che al à di cjapâ cheste esperienza come alc che ai siervirà par simpri. E cuant che chel so amî al impararà ancje lui a fâ chel ciert sarvisj, gno fî al varà un vantaç, parcè che a lu savorà za fâ e duncja al podarà doprâ il so timp par imparâ alc ati di nûf e magari che ai plasarà di plui».

Oscar Puntel

 

Annunci

I commenti sono chiusi.