La ritirade

Ultim scrit. Silvia, prima di lassanûs, a veva completât la so conta dai efiets da seconda guera e in particolâr da l’ocupazion dai Cosacs e dai Giorgians chi di nou.

Ma un ata rouba mi ven in ment – al dîsj simpri il Bepin – che un Georgian una volta al era lât da femina di Guerin Muser a cerî fen pai cjavai, al jout in biela mostra la foto di Guerin ch’al era dispiers in Russjia e ai dîsj: «Io conosco questo uomo, mio amico, eravamo insieme feriti all’ospedale di Tirana, poi ci siamo persi di vista, quando la guerra finisce lui ritorna e io vengo a trovarlo». Prin di partî al è lât a saludâ la femina, ma nè lui nè Guerin a son plui tornâts, parcè che vin savût che a Spittal al è stât consegnât.

L’ultim sabida di Mai tal simiteri militâr di Lienz par ricuardâ chest ecidio al ven un Pope a dî la Messa, si posj mi plâs lâ simpri – al conta il Bepin. Una volta ai cjatada una femina di chês che sji erin salvadas scjampant pas monts, che dopo la int ju veva judâts. Par riconossinça a ven coma in pelegrinagjo, ch’a no posj dismenteâ la gracia di jessi inmò in vita.

E di chei trei muarts: un uficiâl todesc ch’a sji è trat sicûr par no jessi consegnât, forsi no i era restât nissjun in famea e nol veva sperança tal doman. Un ati muart naturâl, cuant che lu àn vistît al era za freit e a no son rivâts a dreçâi un braç. A è lada una fruta a trai la recuia, lu jout cul braç alçât e sji met a berlâ: «Al è inmò vîf! Al è inmò vîf!» e a scjampava duta spourida. E po una femina malada, mari di cuatri fruts, l’om al à scuignût proseguî cui fruts insiema da carovana, cun tant displasei di veila di lassâ in chês cundizions, però dopo al è tornât indevûr par jodi cemût ch’a stava, intant a era muarta.

Mê mari cu la Nicanòs l’à compagnada cu la cjarozula tal simiteri e a ducj i trei àn fat il funerâl coma ch’a sji usa da nou, encja sa sji supon ch’a fossin stâts ortodòs, ch’a vevin la medaia da mieza luna.

E dai bêçs che ai àn lassjât pa Glesia di Temau? A disjin che a sedi stata costruida cui bêçs dai cosacs, infati lôr la clamin Kirche Cosachen, ma la veretât a pâr ch’a seti un ata. Sji dîsji che un uficiâl todesc al è lât da don Ludovico cuntun vuluç di bêçs, al pâr ch’al seti stât un milion, che in chel timp a era una vera fortuna. Forsi al era ce ch’al era restât da paia dai uficiâi, cul intenzion ch’a ju ves doprâts par fâ una gleisia ch’a ricuardàs tal timp i sacrificis, das vitas e das privazions dai popui coinvolts ta chesta inutil e assurda aventura.

Il biât preidi cun chest tesaur al è lât in Curia a Udin par ch’a ju custodissjin lôr chest bêçs fin ch’a no vessin cjapât una decision. Dopo un pousj di agn tolet sù las firmas dai Tamoveisj a son lâts a fâsj tornâ e començada la granda opera da gleisjia dal Cristo Re. Sji po ben dî che se encja a era una fortuna, cun chel gran progjet i beçs todescs a no son bastâts e la int di Temau à fat tancj sacrificis par podeila completâ. Ma cul aiût da Providenza, vuei al è il lôr orgoglio e vant.

Al popul però nol sarès lât jù che i bêçs dai Todescs, forsi insanganâts cul sacrifici dai fradis a fossin restâts achì, alora àn metuda fûr la vousj che no i Todescs ma i Cosacs e Mongui a vevin fata chesta gracia, par chest a è conossjuda oltri confin coma glesia in ricuart dai Cosacs.

Sji conta encja di Georgians (ch’a erin militârs) ch’a vevin cerît un acordo cui partigjans (ormai ai vevin capît cemût ch’a sarès lada a finî la lôr resa) par podei domandâ achì asilo politic. Sji erin cjatâts insiema par discuti tal stali di Maria dal Biel in Spissulot, a vevin di vei cjatât un acordo cuant che una soflada al lôr comant a à fat saltâ dut.

Dopo dal passaç da ritirada la nosta int ch’a veva bisugna di dut, specialmenti fruts e fantats, a lavin jù pal Moscjart e tal Salet a jodi sa cjatavin alc di ce ch’a vevin lassjât o butât via i Mongui. Armas, munizions, fusîi di ogni cualitât, rots e intîrs, elmos, cjars, encja rots (i tocs a podevin servî). Parfint sji impensin di un camion ch’al lava a gasogjeno o a legnas ch’al veva un cjamin ch’al era dai lôr; e po gomas (ch’a sji podeva fâ las soletas dai scarpets), scugjelas, pagjelas, masserizia di ogni sorta e cuzinas e stivâi.

Enos al veva parfint cjatât un binocul. Bepo di Ricardo un imprest ch’al pâr al seti stât l’antenât da motosega, cui sji insumiava in chê volta ce ch’a podeva jessi. Àn cjatât parfint un fonografo cun ducj i discos.

E sin rivâts dapît tal sburî da nosta storia, consegnìn chescj ricuarts a chei ch’a vegnin dopo di nou, par che riconossints seipina aprezâ i sacrificis ch’a à costât la libertât che in timp di pâs nou vuei podin gjoldi e conservâ.

Vei tal cûr i sintiments cristians che mai plui podina puartâ a ripeti i sacrificis di inmolâ l’umanitât pal podei dai grancj. Da chescj sbaglios veibina da imparâ che l’om al è la plui trista bestia da domâ, s’a no scolta il cûr.

Silvia Puntel

 

Annunci

I commenti sono chiusi.