Cuant che a si vierzeva il bosc

Vuei, tornan indevûr cul timp, sin ta Valuta sot la Mont da Tierç, ta zornada ch’a si vierzeva il bosc. A vevin fat un lot ta Valuta. Il vuardian al stabiliva la zornada par vierzi il bosc dopo che i menaus ai vevin puartât fûr las taias e intassât ramaçs e brenas. Vâl a dî che la int a podeva da chel dì in poi, lâ a fâ fûr las legnas e ce che al era restât. Prin di chê dì, se tu lavas dascous e a ti becava Fidêl a era sigûr la multa. Al meteva fûr la ordenança cul avîs par che ducj a podessin savei. Duncja si viodeva l’ora e si preparavisi par timp. Erin una grumia, par plui mularia e feminas che al biel cricâ dal dì si inviavin cul zei su pa schena, cjamâts cun marinda (di solit un eto di marmelada o di sgombro, una gjanduia, una scjatoleta di sardinas o simmenthal piçula e sigûr çuç o argjel e polenta), dopo massanc, manaruta, caruculas, trefui… Tal gno trop a erin la Wilma e la Tecla di Eufemia, la Sperancia, la Mariuta… E sù fint insom da Creta sul Cueston dulà che a era la teleferica, ai lassavin caruculas e trefui che nus servivin plui tart par mandâ jù las cjamas. E dopo sù in Cuel Alt e ta Valuta. Subit a cerî la dassa ch’a nus sameava plui granda, magari dongja da strada, si cjapava ognidun la sô. Bisugnava vei fortuna e cjatâ chê justa, parcè che parsora a podeva vei doma brena, ma sgarfant sot podeva platâ legnas miôr. Dopo vei fat un biel grum, cominçavin a stropalâs fint jù da teleferica aventi dal Sgolvais. A era fata cussì: la cavaleta cun doi gros pâi fûr banda, plantâts tal teren, in profonditât, ben salts. E par traviers, ad alt, un ati, tal mieç un gancio fuart, di fier, dulà che al veva di passâ il fîl a sbalçs (ch’al era di fier ben intorzolât ben grossut), chest oltre la cavaleta al continuava inmò cualchi metro in pendença, fint a jessi ben saldât cun plui zîrs tal ancoragjo che al podeva jessi di fier o un gros pâl implantât profont tal teren, cun aitis par traviers, sot cjera par saldâlu benon. La cavaleta a era circa alta doi metros, po il sbalç al continuava jù fint ta Baraçada, sora il riu di Sgolvais-Jerbamala e al rivava aventi da maseria di Crovatut. Al finiva rasentant il teren dulà che dopo al vigniva intorzolât intun ati ancoragjo coma un paracjar di fier implantât tal peton. Chest viavai, da Valuta a teleferica al durava un pous di dîs cui trops che a si incrosavin sù e jù  ognun al faseva la sô tassa tai paragjos da teleferica. Il plui biel al vigniva dopo, cuant che si veva di mandâ jù las cjamas, naturelmentri a si faseva a turno, cui che prin al finiva la sô tassa al començava a butâ jù.

Dopo vei fata la fassinan leada cul treful (fîl di fier), si meteva la carucula cul gancio tal mieç e a si picjava sul fîl dulà che al era incjemò bas, si la pocava fint al gancio da cavaleta e dopo cun fuarça si dava una biela sburtada par che a cjapàs velocitât, fin a rivâ dapît. Là jù un ati al spietava, dulà che a rivava in plena velocitât, sbatint sul teren, a tocjava stâ lontans che al era pericul che cul salt al podès alc dintor, dopo distacâ la carucula e tirâ via la cjama par chê che a rivava dopo. Intant dal percors da cjama, la cuarda a vibrava fuart e cuant che a si fermava a voleva dî che a era rivada benon e cussì dopo un pouc par chei che a cjamavin insom a si dava vous che al era libar e a podevin tornâ a mandâ jù. A fuarça di butâ jù a podeva stâ che il fîl a si smolàs e al faseva “valanghin” magari propit parsora dal riu dulà che a veva di vei plui fuarça, dato che la corsa a si indeboliva par via che al era un avalament e cuindi la cjama a si podeva encja fermâ se no veva cjapada avonda velocitât. Alora si toleva una legna e a si tacava a bati su la cuarda par jodi se la ves judada a partî indevûr, o pûr si tornava a mandâ jù un ata cun plui velocitât in mût che forsi a vorès pocada encja la prima, ma pous viaçs a lava dreta, il plui das voltas a riscjavin di colâ dutas dôs sul puest o di stroucjâsi. A podeva sucedi encja che la cuarda a jesses fûr da carucola, enfra il gancio blocât. Alora sì che a eron dolôrs par rivâ a distrigâ. Encja cualche incussient si rampinava par un trat su pal fîl par jodi s’al rivava a butala jù ta chest câs, riscjant no doma di colâ, ma che ripartint lu podès travolzi. Sigûr al voleva un pieç di timp par che ducj si rivàs insom, ma si davin simpri una man l’un cul ati. Fortunâts chei da Plaças che a podevin puartâ dopo a cjasa las legnas cu la louza, jù pa strada dai Roncs e Cronouf, fin in plaça; nou inveza inmò cul zei via pai Taiaduz, Valisselas e po finalmenti a destinazion. Pensait cetant che nus costavin chês legnas. La teleferica la àn doprada par plui chei che a vevin prâts e stâi in Cuel Alt o aventi, encja par butâ jù i fàs dal fen. Chesta comoditât no à durât propit tant che il seâ cussì lontan su pa mont al è lât simpri al mancul e po ai àn fat la strada ch’a va in Faas, tal Lavareit e in Cuel Alt. Se a si sieâ e si taia inmò, si po lâ a toli cui mieçs di traspuart e la Creta e il Cueston insalvadeîts cuasi no si conossin ati.

Ma inmò prin da teleferica, cuant che a si lava a fâ legnas e a seâ tai Sgolvais o in ducj chei che prâts parsora fint sot da Mont da Tierç, dut cul zei, si stropavin las legnas un pouc in dì, encja a vora si lava e domandâ par plasei se si podeva butâlas jù pa Creta, cu la cjama al era pericolous, ch’a tu russava tal cret par zirâcji, cui fàs po inmò di plui, a tocjava vegni jù encja devantdevûr, a trats, e cença cuasi jodi dulà che tu metevas i pîs: doma cui che al era pratic e al conosseva i scjalins lu podeva fâ. A erin aitis timps…

 

Silvia Puntel

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione /  Modifica )

Google+ photo

Stai commentando usando il tuo account Google+. Chiudi sessione /  Modifica )

Foto Twitter

Stai commentando usando il tuo account Twitter. Chiudi sessione /  Modifica )

Foto di Facebook

Stai commentando usando il tuo account Facebook. Chiudi sessione /  Modifica )

w

Connessione a %s...

%d blogger hanno fatto clic su Mi Piace per questo: